သင့်လုပ်ငန်းနှင့် အခွန်ငွေ – အပိုင်း ၂

သင့်လုပ်ငန်းနှင့် အခွန်ငွေ – အပိုင်း ၂

သင့်လုပ်ငန်းကိုမှတ်ပုံတင်ခြင်း

သင့် စီးပွားရေးလုပ်ငန်းကို စတင်ရန် သင် အခွန်စာတွဲနံပါတ် ( TFN ) လိုအပ်ပါသည်။ သင့် ရောင်းဝယ်ရေးလုပ်ငန်းအတွက် ဩစတြေးလျားနိုင်ငံ ရောင်းဝယ်ရေးလုပ်ငန်းဆိုင်ရာ သက်သေခံနံပါတ် (ABN) ရဖို့လည်း လိုအပ်ဖွယ်ရှိပါသည်။

TFN အခွန်စာတွဲနံပါတ်

အခွန်စာတွဲနံပါတ် (Tax File Number – TFN) ဆိုသည်မှာ ATO(Australian Taxation Office) မှ သင့်ကို၊ သို့မဟုတ် သင့်အစုစပ်လုပ်ငန်းကို၊ ရန်ပုံငွေအဖွဲ့အစည်းကို သို့မဟုတ် ကုမ္ပဏီကိုထုတ်ပေးသောနံပါတ်ဖြစ်သည်။ သင် မည်သူမည်ဝါဖြစ်ကြောင်း အထောက်အထား ပြနိုင်ရန်အတွက် TFN လိုအပ်ပါသည်။
အခွန်စာတွဲနံပါတ် TFN သည် ဩစတြေးလျားနိုင်ငံတွင် မည်သူမည်ဝါဖြစ်ကြောင်း အထောက်အထားပြနိုင်သည့် အရေးကြီးသော အထောက်အထားဖြစ်ရာ သင့်နိုင်ငံကူးလက်မှတ် သို့မဟုတ် သင့်ဘဏ်ငွေစာရင်းဆိုင်ရာ အချက်အလက်များကို လုံခြုံစွာထိန်းသိမ်းသကဲ့သို့ ထိန်းသိမ်းရန် လိုအပ်ပါသည်။
အကယ်၍သင့်မှာ TFN မရှိသေးပါက သင်မည်မျှပင် ဝင်ငွေရနေစေကာမူ သင်သည် အခွန်ငွေကိုအမြင့်ဆုံးနှုန်းဖြင့် ပေးဆောင်ရန် လိုအပ်နိုင်ပါသည်။ အကယ်၍ သင်သည် ရောင်းဝယ်ရေးလုပ်ငန်းရှိနေပြီး TFN များအကြောင်းနှင့် မည်ကဲ့သို့
လျှောက်ထားရကြောင်း ပိုမိုသိလိုပါက ATO (Australian Taxation Office) တယ်လီဖုန်းနံပါတ် 13 28 66 တွင် မေးမြန်းပါ။

ABN ဩစတြေးလျားနိုင်ငံ ရောင်းဝယ်ရေးလုပ်ငန်းဆိုင်ရာ သက်သေခံနံပါတ်

ဩစတြေးလျားနိုင်ငံ ရောင်းဝယ်ရေးလုပ်ငန်းဆိုင်ရာ သက်သေခံနံပါတ် (Australian Business Number – ABN) ဆိုသည်မှာ သင်က အခြားသော ရောင်းဝယ်ရေးလုပ်ငန်းများ၊ အစိုးရဌာနများနှင့် ATO တို့နှင့်ဆက်သွယ်ရာတွင် အသုံးပြုသော နံပါတ် ဖြစ်သည်။ အကယ်၍ သင်က ABN ကို ကုန်ပို့လွှာများတွင် ဖေါ်ပြခြင်းမပြုခဲ့လျှင် အခြားသော အရောင်းအဝယ်လုပ်ငန်းများက သင့်ကိုပေးရသော မည်သည့်ပေးငွေထဲမှမဆို ၄၆.၅% ဖြတ်တောက်လိမ့်မည်။ သင်၏ ရောင်းဝယ်ရေးလုပ်ငန်း အမျိုးအစားပေါ်မူတည်ပြီး သင့်အနေနှင့် အောက်ဖေါ်ပြပါ အခွန်အမျိုးအစားများကို ပေးဆောင်ရန် မှတ်ပုံတင်ထားရပါမည်။

GST ကုန်စည်နှင့် ဝန်ဆောင်မှုအခွန်

ကုန်စည်နှင့် ဝန်ဆောင်မှုအခွန် (Goods and Services Tax – GST) ဆိုသည်မှာ ဩစတြေးလျားနိုင်ငံတွင် အရောင်းအဝယ်ပြုလုပ်သော ကုန်စည်နှင့်ဝန်ဆောင်မှု အများစုအပေါ်တွင် 10% ပေးရသောအခွန်ဖြစ်သည်။ မှတ်ပုံတင်ထားသော အရောင်းအဝယ် စီးပွားရေးလုပ်ငန်းများက ကုန်စည်နှင့်ဝန်ဆောင်မှု ပေးသွင်းခြင်းပြုသော လုပ်ငန်းအဆင့်ဆင့်တွင် ဤအခွန်ငွေကို ကောက်ခံကြသည်။

အကယ်၍သင်သည် အောက်ဖေါ်ပြပါအချက်များနှင့် ကိုက်ညီလျှင် – GST အတွက် မှတ်ပုံတင်ရမည်။

  • သင်သည် အရောင်းအဝယ်လုပ်ငန်း သို့မဟုတ် စီးပွားရေးလုပ်ငန်းလုပ်ကိုင်နေပြီး သင့်လက်ရှိ သို့မဟုတ် တစ်နှစ်တာအတွက် ခန့်မှန်းခြေ အနုတ်အသိမ်းသည် ဒေါ်လာ ၇၅ဝ၀ဝ သို့မဟုတ် ၄င်းထက်ပိုမည်ဆိုလျှင်
  • သင်သည် အငှားယာဉ်လုပ်ငန်း လုပ်ကိုင်လျှင်၊ သို့မဟုတ်
  • သင်သည် လောင်စာအခွန် ပြန်အမ်းငွေများ လျှောက်ထားလိုလျှင်

အကယ်၍သင်၏ နှစ်စဉ်အနုတ်အသိမ်းသည် ဒေါ်လာ ၇၅ဝ၀ဝ ထက်နည်းနေလျှင်လည်း သင် GST ကို မှတ်ပုံတင်ရန် ရွေးချယ်နိုင်သည်။ မှတ်ပုံတင်ပြီးသည့်အခါ သင့်အရောင်းအဝယ်လုပ်ငန်းအတွက် ဝယ်ယူအသုံးပြုခဲ့ရသော  ပစ္စည်းများနှင့်ဝန်ဆောင်မှုများအတွက် ပေးချေခဲ့ရသည့်  GST ကို ပြန်လည် တောင်းခံနိုင်သည်။

PAYG withholding ခေါ် ပေးငွေများ ထဲမှတစ်ချို့ကို ထုတ်မပေးဘဲ ဆုပ်ကိုင်ထားခြင်း

ဩစတြေးလျားနိုင်ငံ ဥပဒေအရ သူတပါးကိုပေးရသည့်ငွေများ ဥပမာ၊ အလုပ်သမားများ၊ ဝန်ထမ်းများကို သင်ကပေးရသော လစာ၊ သို့မဟုတ် လုပ်အားခကဲ့သို့သော ငွေများထဲမှတစ်ချို့ကို ထုတ်မပေးဘဲ ဆုပ်ကိုင်ထားရန် လိုအပ်ပါသည်။ ၄င်းကို ပေးငွေများ ထဲမှတစ်ချို့ကို ထုတ်မပေးဘဲ ဆုပ်ကိုင်ထားခြင်း (Pay as you go (PAYG) withholding) ဟုခေါ်သည်။ ထိုသို့
ထုတ်မပေးဘဲ ဆုပ်ကိုင်ထားသောငွေများကို ATO ထံ ပေးသွင်းရသည်။
သင်သည်

  • ဝန်ထမ်းများ၊ ကုမ္ပဏီဒါရိုက်တာများနှင့် ရုံးမှတာဝန်ရှိသူများကို ငွေပေးချေရလျှင်
  • လုပ်အား ငှားရမ်းအသုံးပြုရသဖြင့် ငွေပေးချေရလျှင်
  • မိမိဆန္ဒအလျောက် သဘောတူညီချက်များအရ ငွေပေးချေရလျှင်
  • ABN ဖေါ်ပြခြင်းမရှိသော ပစ္စည်းပေးသွင်းသူထံ ငွေပေးချေရလျှင်၊ သို့မဟုတ်
  • တကိုယ်ရေ ဝန်ဆောင်မှု စီးပွားရေးလုပ်ငန်း ဝင်ငွေဆိုင်ရာ စည်းမျဉ်းစည်းကမ်းများအရ ATO ထံသို့ ငွေများ ပေးသွင်းရန် လိုအပ်ခဲ့လျှင်

PAYG ပေးငွေများကို ဆုပ်ကိုင်ထားခြင်းအတွက် မှတ်ပုံတင်ရန် လိုအပ်ပါသည်။

Fringe Benefits Tax – FBT ခေါ် ဘေးပန်းအကျိုးခံစားခွင့်များ အခွန်

အလုပ်ရှင်တစ်ဦးအနေနှင့် သင်သည် အလုပ်သမားများကို ဘေးပန်းအကျိုးခံစားခွင့်များ ပေးပါက သင်သည် ATO ထံသို့ ဘေးပန်းအကျိုးခံစားခွင့်များ အခွန် (Fringe Benefits Tax – FBT) ပေးသွင်းရမည်ဖြစ်ပါသည်။ ဘေးပန်းအကျိုးခံစားခွင့်များဆိုသည်မှာ ယေဘုယျအားဖြင့် အလုပ်သမား၊ဝန်ထမ်းများ နှင့်/သို့မဟုတ် ယင်းတို့၏မိသားစုဝင်များကိုပံ့ပိုးသည့် ငွေသားမဟုတ်သည့်အကျိုးခံစားခွင့်များဖြစ်သည်။ ထိုအကျိုးခံစားခွင့်များတွင် အောက်ဖေါ်ပြပါအကြောင်းအရာများပါဝင်နိုင်သည်။ –

  • အလုပ်နှင့်ဆိုင်သောကား သို့မဟုတ် အလုပ်နှင့်ဆိုင်သည့် အခြားကိရိယာပစ္စည်းများကိုပုဂ္ဂလိကအကျိုးအတွက် အသုံးပြုခွင့်
  • လုပ်ငန်းခွင်ပြင်ပတွင် ဝတ်ဆင်နိုင်သောအဝတ်အစားများ
  • ပုဂ္ဂလိက ကျန်းမာရေးဆိုင်ရာအာမခံ ပေးသွင်းခြင်း သို့မဟုတ်
  • အတိုးသက်သာသော ချေးငွေများ၊ ဖျော်ဖြေရေး သို့မဟုတ် ပစ္စည်းများ ဖြစ်ကြသည်။

ATO မှ မြန်မာဘာသာဖြင့်ထုတ်ဝေသည့် “လုပ်ငန်းငယ်အတွက် သိကောင်းစရာ အကျဉ်းချုပ် – သင့်လုပ်ငန်းနှင့် အခွန်ငွေ” စာစောင်မှ ကူးယူဖော်ပြပါသည်။